Олимп ойыннары алнындағы Россия чемпионады: Малышеваның – алтын, Пудованың – хола медаль.

3 мая 2024 г. в 10:00

Фото из открытых источников

Хосхар айының 3-ҷі кӱнінең силкер айының 4-ҷі кӱніне теере Москвадағы Life Аренада Олимп ойыннары алнындағы олаңай кӱресче марығлар ипчілер паза иреннер аразында ирт пардылар.

Анда 500 азыра спортсмен 20 аймах кӧдірімде марығласханнар.
Хакасиядағы Наталья Малышева 53 кг теере кӧдірімде ӱс тоғазығ иртірібізіп, Олимп ойыннары алнындағы Россия марииның чиңісчізі полыбысты. Чиңіске удур ағаа Москвадағы Надежда Матвееванаң тоғазарға киліскен. Аны азынадох 10:0 саннаң чиңіп алған. Чарым азах-меетте Санкт-Петербургтағы Анжелика Ветошкинанаң тоғасхан. Аны чир-суғҷыбыс 4:2 саннаң утып алған. Азах-меетте, тізең, Дагестандағы Милана Дадашеванаң тоғасхан. Аны Наталья оой ла чиңіп алған. Малышеваның тренерлері Владимир Чучунов паза Леонид Чучунов полчалар. Пастағы тренері - Леонид Бутонаев.
50 кг кӧдірімге теере пӧлікте Наталья Пудова кӱресчібіс хола медаль утып алған. 1/8 чардыхта ол Саха чиріндегі Александра Копылованы 2:1 саннаң утып алған. Аның соонаң Ростов облазындағы Натиа Сванидзені 10:0 саннаң чиңен. Чарым азах-меетте Новгород облазындағы Надежда Соколоваа 0:10 саннаң чиңдір салған. Хола медаль ӱчӱн кӱрезігде Тывадағы Алдынай Даржааны 13:2 саннаң утып алған. Чир-суғҷыбыстың тренері Марат Кичеев полча. Пастағы тренері – Евгения Карамчакова.
Олимп ойыннары алнындағы марығларға кӱресчілерні Леонид Чучунов тренернің устаанынаң тимнееннер.
САЛТАРЛАРЫ
50 кг кӧдірімге теере
1 орын – Надежда Соколова (Новгород облазы)
2 орын – Елизавета Смирнова (Дагестан)
3 орын – Наталья Пудова (Хакасия), Мария Тюмерекова (Кемеров облазы).
53 кг кӧдірімге теере
1 орын – Наталья Малышева (Хакасия)
2 орын – Милана Дадашева (Дагестан)
3 орын – Анжелика Ветошкина (Санкт-Петербург), Дарья Хвостова (Хызылчар крайы)