Ағбанда теелбек спортынҷа городтың азых марии иртер

19 апреля 2024 г. в 14:00

Фото из открытых источников

Хосхар айының 20-ҷі кӱнінде «Н.Г. Булакиннің Кубогы» тіп городтың азых марии иртер.

22 чыл мының алнында, 2002 чылда, Николай Генрихович Булакиннің чӧбінең спорт теелбегінҷе городтың пастағы азых марии ирт парған. Ол чылларда пу спорт кӧрімі городта наа ла тоғынып пастаан полған, андар 4 тренер тоғысха алылған. Пастап ла кубок спортсменнерге алай ба оларның тренерлеріне нимес, че спорт школазына пирілҷең.

2003 чылда Ағбандағы Чииттер ӧргезінде килістіре орын табыл парғанда, гороод пазының сыйиина 2-ҷі марығ анда ирткен.

Кубокха паза городтағы теелбек мариина 2005 чыл ідӧк танығлығ полыбысхан. Кӱрген айында теелбек спортынҷа олған школазы азыл парған. Андар Ағбандағы парчан теелбек пірігістері киріл парғаннар.

2010 чылда «Абакан» спорт ӧргезінде ӧнетін зал азылча. Город пазының сыйиина марығ мында иртірілер тіп чарадығ алыл парча.

Ол тустаң пасти кӧрігҷілер саны ӧскеннең ӧсче, кӧрігҷілер залында пос орыннар халбинча. Спортсменнер, тізең, тиксі кирексіністерге нандырчатхан чирде арға-мӧрійге сыхчалар.

Пӱӱлгі марығлар Н. Г. Булакиннің адынаң спорт ӧргезінде ӱс пӧлікке чарылып иртерлер: 10:00, 13:00 паза 16:00 часта. 10:00 часта – иң кічіглернің марии, 13:00 – таллағлығ пӧліктер, 16:00 часта – азах – мееттер.

Марығлар пайрамни 16:00 частаң азыларлар. Олғаннар чыылған чонға пастағы теелбектерін кӧзідіп пастирлар. Чон алнына ідӧк Александр Ситников паза Полина Яценко сығарлар. Олар ӧнетін Хызылчардаң килчелер, теелбек спортынҷа спорт узына кандидаттар, Сибирь федеральнай округ паза регион синіндегі марығларның чиңісчілері полчалар.

Ағбандағы спорт школазынаң 200 кізі кӱс сыназар. Аалҷылар санынаң марығларда Хызылчардағы, Ачинсктегі, Емельяноводағы, Хызылдағы, Новокузнецктегі спортсменнер аралазарлар.

Марығ чарғыҷылары Хызылчар крайынаң, Новосибирск облазынаң, Хакас Республиказынаң поларлар. Ағбаннаң - Любовь Роговая, Ирина Федотова, Роман Федотов тоғынарлар. Марығларның ӧӧн чарғыҷызы - Елена Яценко, орындағы теелбек салҷаң федерацияның президенті.

«Н.Г. Булакиннің Кубогы» марығлар Ағбандағы спортсменнерге иң аарлыға саналчалар. Ол ирткен чылның салтарларын кӧзіт пирче паза чағдапчатхан марығларға пасталғаны полча.

Ағбан городтың ӧнетін порталы