Наталья Пудова чир-суғҷыбыс тилекей мариинда кӱмӱс утып алды

28 октября 2024 г. в 08:48

Фото из открытых источников

Кичкер айының 23 – 25 кӱннерінде ипчілер кӱрезінҷе Россияның піріктірілген командазына кіріп, Наталья Пудова Албаниядағы Тиранада ирткен U-23 тилекей мариинда араласты.

Наталья 50 кг кӧдірімге читкелектер аразында кӱрескен. Тиксі алып алза, анда 20 спортсмен кӱрескен. Олар США-даң, Тӱрк чирінең, Казахстаннаң, Панамадаң, Индиядаң, Канададаң, Румыниядаң, Словакиядаң, Польшадаң, Хыдаттаң, Моол чирінең, Литвадаң, Хыдаттағы Тайбэйдең, Япониядаң, Швейцариядаң, Украинадаң, Азербайджаннаң, Мароккодаң, Беларусьтаң паза Россиядаң полғаннар. Таныхтирға кирек, Россиядағы паза Беларусьтағы спортсменнер марығларда пос алынҷа атлеттер чіли араласханнар - AIN.
1/8 азах-меетте Наталья Панамадағы Юснейри Наджай Вест кӱресчіні 12-0 саннаң чиңіп алған (туше). ¼ - те Украинадағы Наталья Кливчуцкаяны утхан. Чарым азах-меетте Беларусьтағы Наталья Варакинаны утып алған. Азах-меетте США-дағы Сейдж Рейн Мортимер кӱресчінең тоғасхан. Ағаа 5:7 саннаң чиңдір салып, тилекей мариинда кӱмӱс медаль утып алды.
Натальядаңар хоза искіріг
Наталья Пудова – Россияның олаңай кӱресче спорт узы. Хакас чиріндегі кӱрестерҷе СШОР ӱгренҷізіне саналча. Тренерлері - Марат Кичеев, Виталий Канзычаков, пастағы тренері – Евгения Карамчакова.
Пастағы чиңістерін саарбах тузында 2021 чылда тудып пастаан: 53 кӧдірімге читкелектер аразында ирткен Россия мариинда хола медаль утып алған.
2022 чылның кӧрік айында Надымда (ЯНАО) ирткен Россия мариинда азах-меетке сығып алған. Анда ол Тывадағы Чойгана Туматха ла чиңдір салған. 2022 чылның сентябрь айында Беларусьта ирткен Сергей Смальның сыйиина чоннар аразындағы синніг марығларда ідӧк азах-меетке читкен. 2024 чылның январь айында Наталья Хызылчарда Иван Ярыгинның кубогында хола медаль утып алған. 2024 чылның силкер айында пастағызын на улуғлар аразындағы Россия чемпионадында аралазып, хола медаль утып алған. 2024 чылның сентябрь айында 23 часха читкелектер аразында Россия марииның чиңісчізі полыбысхан.