Якутсктағы «Азияның олғаннары» марығның чиңісчілерін чеестир орын кӧріл парды

7 июня 2024 г. в 13:37

Фото из открытых источников

«Азияның олғаннары» тіп VIII Чоннар аразындағы синніг спорт ойыннарының чиңісчілерін чеестирі Ойыннар иртер культура паркында парар. Ол Якутсктағы Комсомол ачығында орныхча.

Тиксі алып алза, 239 медаль сыйлал парар. Аннаңар ӧнетін иртірілген чыылығда республика правительствозының кнес орынҷызы Сергей Местников искірген

Ойыннарда чиңіс тутхан паза сыйыхтығ орыннар алғаннарны чеестирі ікі чардыхха чарылып иртерлер. Пастағы чардығында – чахайахтар сыйлалар – спорт марығлары ирткен орында сыйлаларлар. Ӏкінҷі чардығы – медальлар читірері – кӱннің сай Комсомол ачығында 19.00 частаң пасти читіріл турар.

Сыйыхтар санына абдыраҷахтағы медаль, пічік паза нымзах ойнаҷах – Ойыннарның талисманы кірче. Медаль ідӧк чиңісчілернің тренерлеріне читірілер.

Ойыннарның чиңісчілеріне «Азияның олғаннары» Чоннар аразындағы комитеттең чиңісчі таңмазы пирілер.

Чӧптің тоғызы тузында «Ойын кізілері» тіп волонтерлар ӧмезі тӧстел парғанынаңар хабар читті. Олар чиңісчі спортсменнерні чеестирін апарарлар. Оларның санына чаламаларны кӧдірҷең 22 кадет кірче

Ойнаҷаң спорт кӧрімнеріне 15 кубок пазза 1498 медаль тимнел партыр. Тиксі марығлар иртчең орыннарда чахайахтар сыйлаҷаң орыннар кӧріл парған.

Чыылығны салтарлап, Сергей Местников чеестирінің проектін тимнеп салардаңар чахығ пирібіскен.

VIII Чоннар аразындағы синніг «Азияның олғаннары» ойыннар пу чылның 25 июнь кӱнінең пасти 7 июльға теере Якутскта иртерлер.

Россияның президенті Владимир Путин «Азияның олғаннары» ойынны олғаннарға иң артых спорт пайрамнарының пірсі тіп таныхтаан полған.

Саха республиканың пазы Айсен Николаевтің таниинаң, «Азияның олғаннары» марығлар хазнада 2024 чылда иртер палаларға иң улуғ спорт пайрамы. Аны ідӧк иң не пӧзік синде иртер тіп таныхтапча.

Саха (Якутия) республика пазының паза Саха (Якутия) Республика Правительствозының хабарлар пӧлии