Хакас чирі грек-рим кӱрезінҷе тиксі Россия мариина тимненче

11 октября 2024 г. в 10:26

Фото из открытых источников

Кічіг хырлас айының 2 паза 3 кӱннерінде Ағбандағы Добровольского, 1 В адресче орныхчатхан спорт залында грек-рим кӱрезінҷе РСФСР-ның саблығ тренері, Хакасияның физическай культураҷа паза спортча саблығ тоғынҷызы М. И. Боргояковтың хумартхызына чарыдылған тиксі Россия марии иртер.

Пір саңай ӱс кибісте парар марығлар 18 часха читкелек оолахтар аразында 12 аймах кӧдірімнерҷе иртерлер. Тиксі алып алза, 300-че кӱресчі аралазары кӧрілче.

Пӱӱн Хакасияның спорт министерствозында марығлар иртірерінҷе нандырығлығ чонның чыылии ирткен. Анда арға-мӧрійні иртірерінҷе ӧӧн сурығлар ӱзӱрілгеннер, ол санда, марығлар иртер орынны тимнирі, аның изерізі, ідӧк пайрамни азылары, пістің піріктірілген комндаа кірер чонны, чиңісчілерге паза сыйыхтығ орыннар алғаннарға сыйлир сыйыхтарны, ӧӧн чарғыҷылар чӧбінің тоғызын, кӱресілерні марығ иртер орынға ағыларын, онлайн-кӧзідігні.

Марығның тӧстегҷілері

- Хакас Республиканың физическай культураҷа паза спортча министерствозы, хойнындағы спорт пӧліктері

- Сумо, грепплинг, спорт кӱрезінҷе федерация, «Хакасияның кӱресчілері» панкратион

- Хакас Республиканың спорт кӱрезінҷе федерациязы

Ахча саринаң хабазығ

- «Антоневич паза партнерлар юридическай полызығ»

- «Ойна» алтын аныпчатхан пірігіс

Таныхтирға кирек, чыл тоозылғанҷа Хакас чирінде кӱресче тиксі Россия синіндегі 2 хоза марығ иртері кӧріл парған.

Хакасияның спорт министерствозы Россияның кӱресче федерациязынзар С.З. Карамчаковтың паза В.И. Чарковтың хумартхызына марығларны иртірерінҷе сурыныстығ пічіктер ызыл парғаннар. Чарадығлар килзе, марығлардаңар искіріг Хакасияның спорт министерствозының ӧнетін сайтында сығарыл парар.

Искіріг

Боргояков Михаил Игнатьевич – грек-рим кӱрезінҷе СССР-ның саблығ тренері, Хакас Республиканың физическай культураҷа паза спортча саблығ тоғынҷызы. Михаил Игнатьевич тренер тоғызын пастаан соонаң, Хакас чирі – кӱстіг грек-рим кӱресчілерін ӧскірчеткен пірсі орын полыбысхан. Ол чоннар аразындағы синніг 2 кӱресчі, СССР-ның паза Россияның 30 азыра спорт узын ӧскір салған. Аныңох холынаң оолахтар аразында грек-рим кӱрезінҷе СССР марииның тӧрт чиңісчізі, РСФСР-ның сигіс чиңісчізі сыххан.