Хакас чиріндегі спортнаң айғасчатхан пенсионерлер тиксі Россия синіндегі спартакиадаа парарлар

1 октября 2024 г. в 10:03

Фото из открытых источников

Команданың марығларға тимненізін кӧрерге пу наада спорт министрі Сергей Кочан чӧр килді.

Кичкер айының 1 – 5 кӱннерінде Кемеровта тынағдағы чонның аразында IX спартакиаданың халғанҷы чардығы иртер. Анда 700 – ке чағын кізі аралазары кӧрілче, олар хазнаның 74 регионынаң поларлар. Ӏдӧк пасха хан чирлерінең килерлер: Белорусьтаң, Индиядаң паза Финляндиядаң.

Арға-мӧрій ГТО сыныхтағларын тударынҷа, арали эстафетаҷа, иртен иділчеткен зарядкаҷа, стол теннизінҷе, чӱзерінҷе, шахматча, ниик атлетикаҷа, ухтаң атарынҷа, дартсча паза волейболҷа парар.

Тренировкада пол килген физическай культураҷа паза спортча министр Сергей Кочан піди таныхтаан:

«Пістің спортсмен пенсионерлерібіс пазох ла чиңіс соонҷа чолға сығарға тимненчелер. Ирткен чылда олар Россияда ӱзінҷізі полыбысханнар. Арали эстафетада хайди дее чиңіс тударлар. Мында пістіңнерні асчаңнар табылбинча. Оларның иирде Харатаста иртчеткен тимненістерін кӧрдім. Чахсы тимненчеткен ӱчӱн улуғ алғыс! Чир-суғҷыларыбыстың чоллары азых ползын! Пістіңнернің ӱчӱн ағырчабыстар».

Хакасияның ӱчӱн Иван Мисюк, Ирина Мисюк, Иван Обогрелов, Евгения Дарбека, Валентина Куш, Виталий Майтаков, Валентина Кольчикова, Эдуард Толмачев, команда устағҷызы – Алексей Грудинин турызарлар.

Сағысха киріп, ирткен чылдағы мындағох марығларда пістің спортсменнерібіс тиксі хазнада иң кӱстіглернің санында пол парғаннар.