Алексей Николаевич Карамашев ӱреен. Хакасияның спорт министерствозы туғаннарынаң чобағнаң ӱлесче

27 сентября 2024 г. в 11:46

Фото из открытых источников

Ӱртӱн айының 26-ҷы кӱнінде Ах чарыхтаң Хакас Республиканың спортча паза физическай культураҷа саблығ тоғынҷызы Алексей Николаевич Карамашев парыбысты.

Хакасияның спорт министерствозы аның туғаннарынаң улуғ чобағнаң ӱлесче. Чир-суғҷыбыснаң 28 сентябрьда 12:00 частаң 13:00 часха теере Ағбан, Кожевенная, 34 адрестең анымҷохтазарға килерге чарир.
Алексей Николаевич Карамашев 3 мартта 1938 чылда Таштып аймаандағы Сарығлар аалында тӧреен. (Сағам Асхыс аймаана кірче). Пабазы, Николай Семёнович Карамашев, чаада ӱреен, аннаңар аны Мария Павловна Карамашева іҷезі ӧскірген. Таштыптағы ортымах школаны тоосхан соонаң, ӱгренізін Хызылчардағы технологическай институтта узаратхан.
Студент чылларында спортнаң айғасхан. 1961 чылда ағаа «СССР-ның олаңай кӱресче спорт узы» ат пирілген. Хакас чирінде олаңай кӱресче спорт узы ат алған пастағы кізі полыбысхан. 60 чылларда аймах синніг марығларның чиңісчізі полыбысчаң – Сибирь, Ыраххы Восток, Москва, Россия паза СССР. Совет чылларындағы чиңістер Алексей Николаевичке ӱгренізін Москвадағы пірее вузта узаратчаң оңдай пирген. Чир-суғҷыбыс Э. Циолковскийнің адынаң МАТИ-ні таллап алған.
Ӏстеніс чолын 1963 чылда студент тузындох 282 п\я, анаң 2325 инженер полып пастаан. 1964 чылда Москвадағы Э. Циолковскийнің адынаң авиация институдын тоосхан.
НАТИ паза ГосНИТИ, Сухойның конструкторлар пӧлиинде тоғынған.
1973 чылда аспирантураны тоозыбызып, техническай наукалар кандидады ат алҷаң диссертациязын арачылабысхан. Тоғыс таа, наука даа ағаа спортнаң айғазарға харығ полбааннар. Алексей Николаевич каратэнең айғас сыххан. СССР-ның спорт комитедінде ағаа каратэҷе ӱгретчі тренернің пічии пирілген.
1980 чылда Хакас чирінзер айланып, Хакас техническай институтта тоғынып пастаан. (2006 чылдаң пасти Сибирь федеральнай институттың пӧлии полча). Машина пӱдірерінҷе кафедраның доценті полыбысхан паза физическай ӱгредігҷе кафедраны устабысча.
20 чыл изере кафедрадағы тоғызынаң пірге олғаннарны паза чииттерні каратэге ӱгредерге маңнанҷаң. Пу тус аразына ікі халых пірігіс тӧстирге маңнанған: Хакас Республиканың косики кратэҷе федерациязын паза «Школа боевых искусств» АОО-ны. Пу команда аймах синніг марығларда чиңіс тутчаң.
2000 чылдаң 2013 чылға теере Алексей Николаевич кӱрестерҷе ДЮСШ-да косики каратэҷе ӱгретчі тренер полып тоғынча. 200 чылдаң пӧзік категориялығ тренер, 2004 чылда, тізең,косики каратэҷе чоннар аразындағы синніг чарғыҷының пічиин алған.
А.Н. Карамашевтің ӱгренҷілері кӧп хати Сибирь паза Россия синіндегі марығларда чиңісчі пол турғаннар. 2004 чылда пір ӱгренҷізі Грецияда ирткен саарбахтар аразындағы тилекей мариинда чиңісчі полыбысхан. 2006 чылда Японияда улуғлар аразында тилекей чемпионадында хола медаль утхан. 2013 чылда Япониядох саарбахтар паза улуғлар аразында чемпион полыбысча. Ӏкі ӱгренҷізі, тізең, Европа Кубогының чиңісчілері полыбысханнар.
Алексей Николаевич Ағбанда косики каратэҷе марығларда кӧп кізі араласчан оңдайны тӧстеп алған. Ӱгренҷілері чыл сай республикадағы аймахтарда паза городтарда , Сибирь паза Россия синіндегі марығларда, чемпионаттарда араласчаңнар.
1997 чылда кӧп кізі айғасчатхан спорт тилізіне улуғ хозым иткен ӱчӱн, ӱгренҷілерін пӧзік синде тимнепчеткен ӱчӱн А. Н. Карамашев «Россия Федерациязының физическай культураҷа паза туризмҷе хазна коомитедінің «Физическай культура паза спорт отличнигі» таңмазынаң таныхтатча. Олох чылда ағаа «Хакас Республиканың физическай культураҷа паза спортча саблығ тоғынҷызы» ат пирілче. Кӧп хати городтың устағ-пастаа ағаа алғыстастығ пічіктер читірген.
2014 чылда А. Н. Карамашев «За заслуги перед Хакасией» орденнең таныхтатхан.
https://stm19.ru/news/13346