Хакас чиріндегі дзюдо спортсменнері «Дзюдо планетазында» ӱгренчелер

24 сентября 2024 г. в 15:42

Фото из открытых источников

Ӱртӱн айының 10 – 30 кӱннерінде «Смена» тіп тиксі Россия синіндегі олған кінінде «Планета дзюдо» тіп ӱгредігліг программа чуртасха кирілче.

Ӱгредігде Россияның 12 регионынаң 50 спортсмен араласча. Оларның санында – Харатастағы Никита Воропаев паза Кирилл Мамаев («Ах Барс» дзюдо клубы). Чир-суғҷыларыбыс устарын кӧдірерге полысчатхан ӱгредігде хазнадағы иң не кӱстіг спортсменнернең араласчалар.
– Пасхалалчатхан сари – паллаларнаң айғазарына дзюдоҷа Россияның піріктірілген командазына кірчеткен тренерлерні паза саблығ спортсменнерні хосханы полча, - искірчелер Хакасиядағы дзюдо федерациязында.
Сағысха киріп
«Планета дзюдо» ӱгредігліг программа тиксі Россия синіндегі «Смена» олған кінінде пастағызын на чуртасха кирілче.
«Планета дзюдо» хоза пілістер пирчеткен программаны Россияның дзюдоҷа федерация кізілері хазых чуртас апарар ӱчӱн паза чағбан чӱректіг поларына ӱгредерінҷе, дзюдоны олғаннар аразында хазых пиктепчеткен спорт кӧрімі чіли ӧнетін тимнееннер.
2016 чылдаң пасти «Планета дзюдо» программа «Артек» тіп Чоннар аразындағы синніг кінде тоғынча. 2023 чылдаң пасти Россияның дзюдоҷа федерациязы пу ӱгредігліг киректі хоза ікі олған кінінде чуртасха кирібіскен: «Океан» кінде паза «Алые парусада». 2024 чылда, тізең, оларға тиксі Россия синіндегі «Смена» кін хозыл парды.
Ӱгренерге парҷаң ӧнетін отрядтар таллағ ирткен марығлар соонаң тӧстелчелер, аннаңар постың кӱстенҷік хылиин кӧзіткен хайдағ даа пала андар кір парғадағ, анда тиңнезерге кӱстенчеткен спортсменнең кибісте тоғазып алар оңдайлығ.