Асхыс аймаанда «Дельфин» бассейнні иптирі узарадылча

9 сентября 2024 г. в 16:34

Фото из открытых источников

Тоғыстар 2022 чылдаң пасти «Спорт – норма жизни» федеральнай проекттің «Демография» нацпроекті хоостыра апарылчалар.

Бассейн 1974 чылда пӱдірілген, 2018 чылның август айында, тізең, спортнаң айғазарына чарабиныбысхан. Чуртағҷылардаң бассейнні пазох тоғындырарға кирек полчатханынаңар айланыстар кірген соонаң Хакасияның правительствозының чарадиинаң, сомҷаң орын нацпроектке киріл парған. Хакасияның спорт министерствозынаң паза аймахтың устағ-пастаанаң кирек пічіктер тимнел парғаннар. Тыхтағ тоғыстарына федеральнай бюджеттең 66, 5 млн салковай, республика бюджедінең 52,3 млн салковай кірген паза аймах 1,7 млн салковай пирген, - таныхтаан социальнай страницаларында Хакасияның физическай культура паза спорт министрі Сергей Кочан.

Сағысха киріп, пастап ла тоғыстарны апарчатхан пірігіске «Энигма» ООО чарадыл парған полған. Пу пірігіс тоғысха сыданмаан. Амды бассейнні иптирінең «Аркстрой» ООО айғасча. Пӱӱнгі кӱнде бассейн орныхчатхан тураның ибіркі чирі иптелче, хыры тӧзелче, бассейн айағының стенелері иділче, чарытхы тартчаң, сантехника паза даа пасха тоғыстар апарылчалар. Тиксі тыхтағ тоғыстары 2024 чыл тоозылғанҷа иділ парарға киректер. Бассейн тимге сых парза, анда «Тея» спорт кінінде хазыхтарын пиктепчеткен тиксі спортсменнерге тынанарға чарадылар.