Республикадағы кӱрестер школазында тыхтағ тоғыстары иділ парды

15 августа 2024 г. в 17:05

Фото из открытых источников

Республикадағы кӱрестерҷе олимп резерві школада наа ӱгредіг чылы алнынҷа тыхтағ тоғыстары иділ парды.

Кӱрес залындағы стенелер тыхтал пардылар паза сырлал пардылар, наа кибістер тӧзел пардылар, чылығ пирері кизекти иптел парды. Улуғ нимес тыхтағ тоғыстары устағ – пастағ кабинеттерінде паза спортсменнернің кип-азах алыстырҷаң орыннарында иділ парды. Спортшколазар Хакасияның физическай культура министрі Сергей Кочан чӧр килді.
- Пу школада апарылар улуғ тыхтағ тоғыстары 2026 чылға кӧріл парғаннар - спорт залын пӱдірері. Наа спортзалны амғы туранаң піріктірчеткен ӧнетін иртчең орын пӱт парар. Кирек пічіктер тимнел парғаннар, олар сыныхтаға ызыл пардылар. Школаның 2 чардығы пір тӧӧй кӧрінер ӱчӱн аның алнындағы ачых чир ідӧк иптел парар. Анда, арса, тренажерлар даа турғызыл парарлар. Ол сурығ ам даа ӱзӱрілче, - искірген Сергей Кочан социальнай сетьтердегі страницаларында.
Танныхтирға кирек, пу школада 780 кізі ӱгренче. Олар спорт кӱрезінең, бокстаң, самбонаң, сумонаң айғасчалар. Спорт кӧрімнерінең Ағбанда, Асхыс, Пии, Ағбан пилтірі аймахтарында айғасчалар.