Сойанзар ММА чиңісчізі Олег Борисов килді

Сойан городтағы Кӱрестер кінінде ММА АСА устар лигазының чиңісчізі Олег Борисов ааллапча. 

Пеер хазнаның аймах чардыхтарынаң саблығ спортсменнер чыылчалар, мында  аймах кӱрестерҷе  постарының устарын кӧзітчелер. Ӱр ле ниместе Виталий Минаков ааллаан. Ол ӱгренҷілерні самбо кӱрезіне ӱгреткен.

Ӱр ниместе мында ідӧк Алексей Колесников саблығ кӱресчі пол парыбысхан. Силкер айының 25-ҷі кӱнінде, тізең, Кӱрестер кінінде ММА АСА устар лигазына кірчеткен Олег Борисов пол парыбысхан. Тудысча 6 хати тилекей чиңісчізі, хол тудызынҷа тилекей паза чиңісчізі, боевое самбоҷа Алтынзархы – Кидеркі федеральнай округтың чиңісчізі. Сойандағы спортсменнерге аралас парған кӱрестерҷе  морсымнығ мастер-класс иртірібіскен.

Олег Борисов, нинҷе-нинҷе хати тилекей чиңісчізі:

– Пу залда спортнаң айғасчаң хандыра оңдайлар иділ партыр. Мин регионнарҷа удаа чӧрчем, полғанында ла мындағ оңдайлар чоғыл. Спортзалҷа чӧрібіскем, аны кӧрглебіскем. Мында чиңісчілерні ӧскірерге чарир. Чарас ла кізілерні таап алып, тоғынарға кирек. Минің кӧрізімнең: Сибирь – кӱс орны осхас. Мындағ морсымнығ спортнаң айғасчаң орын пары – олғаннарға часка. РУСАЛ – морсымнығ ниме.

Александр Полех, Кӱрестер кінінің ӱгренҷізі:

– Мындағ улуғ кӱресчілер пістің кӧңнібісті кӧдірчелер, олар осхас поларың килче. Пу мастер – класстар постың узын наа синге кӧдіріп аларына оңдай пирчелер. Мында чиңісчілер ӧскіреріне  прай оңдайлар пар.

Кін азылған тустаң ала пеер 2000 азырох кізі чӧрче, ол санда олғаннар паза саарбахтар. Опыттығ тренерлер ӱгредіг киреен пасха-пасха частығларға ӧнетін  программаларҷа апарчалар. Мында ідӧк город паза регион синіндегі марығлар иртірілчелер.

Евгений Молодняков, Сойан городтың пазы:

–  Пір чыл мының алнында пістің мындағ Кін пол килгеніне  ӧрінчем паза РУСАЛ пірігіске аның ӱчӱн  алғызым читірчем. Пу тус аразына пеер орындағы палаҷахтар паза саблығ спортсменнер чыыларға хынчатханын кӧрчебіс. Статистиканы кӧрібіскебіс: пу чыл аразына кӱреске  паза даа пасха спорт кӧрімнерінең айғас сыхханнарның саны хозыл парған. Пу тоғысты ӧткін апарарынаңар президент тее чоохтапча. Таныхтирға  кирек, піс пір орында турбинчабыс. Пӱӱл пӱдіріг тоғыстары  узарадыларлар.

ЦСЕ Сойанның улуғ поғдархазы пол парған. Ол тиксі Хакасиядағы спортсменнернің кӧңніне кірче. Пу Кін региондағы паза городтағы кӱрестерні хандыра тилідібіскен.