«Чилдең дее табырах» пайрам - спорт ӱлӱкӱні!

27 мая 2024 г. в 16:11

Фото из открытых источников

Николай Генрихович Булакиннің хумартхызына чарыдылған «Чилдең дее табырах» пайрам силкер айының 26-ҷы кӱнінде чӱгӱрерге хынчатханнарны Ағбанда чыып алған. Пайрамда аралазар ӱчӱн республика кінінзер Хызылчар крайынаң, Москвадаң, Новосибирсктең, Хакасиядаң паза даа пасха чирлердегі спортсменнер килгеннер.

Араласчыларны Ағбанның пазы Алексей Лемин удурлаан:

– Мин сірерні Ӱстӱнзархы Сибирьде иртірілчеткен иң не артых «Чилдең дее табырах» пайрамда удурлапчам! Чӱгӱрчеткеннер мариин пӱӱл 4-ҷі хати иртірчебіс. Пӱӱн 2512 кізі чӱгӱрісте аралазар! Иң чиит кізее, ол позының чолын хаҷанох чӱгӱрібіскен, ӱр ле ниместе ікі час чарым тол парған. Иң улуғ частығ араласчаа, тізең, 84 час! Ӧӧн дистаницияда чӱгӱрер иң не опыттығ кізее – 70 час – ол 21 километр чӱгӱрісте араласча! Аарлығ арғыстар! Пісті прайзыбысты спортха, хазых чуртасха паза хынған городыбысха хыныс піріктірче. Хада піс – кӱстігбіс, хада піс – пір чӧптігбіс! Изен ползын спорт, изен ползын Ағбан!

Пір чӧптіг чон айас кӱнге, арғыстарның ӱчӱн ӧрінді. Уғаа кӧп кізі пір кирекке хозылғаны ӧріндірче – чӱгӱріске. Сустаң килген Виктор Масленицин – чӱгӱрістің иң улуғ частығ кізілернің пірсі. Ағбанзар иртен иртӧк киліп алып, чииттерге кӧзідім полыбысхан:

- Номер аларға маңнанар ӱчӱн иртен иртӧк таксиліг килгем. Мағаа пӱӱл 85 час толар. Школа тузынаң ала чӱгӱрерінең айғасчам, соонаң Физическай культура паза спорт институдын тоозыбысхам. Ӏдӧк саналығ чӱгӱрерге, ориентированиеге, кроссха хынчам. Мындағ пайрамнар киректер. Кӧп кізі араласчатхан чӱгӱрістер физическай культураны паза спортты уламох тилідерге оңдай пирчелер. Чӱгӱрері – чуртасха уғаа кирек ниме!

Екатерина Горелова – чиит, че уғаа кӱлӱк араласчы. Пӱӱн чӱгӱреріне пір саңай тӧрт Горелов сыххан:

– Піс тӧртелеңміс: мин паза ӱс пала!Ӱзінҷі чылы араласчабыс. Пӱӱл піске пір кізі хозыл парған – очы хызыбыс чӱгӱріп пастапча. Сӧбірені пір чӧптіг, хазыхты пиктепчеткен ӱчӱн чӱгӱрерге хынчабыс. Тӧстегҷілерге улуғ алғыс. Медальлар хандыралар! Олғаннарның кӧңнілеріне прай ниме кірче, хандыра!

Араласхан сӧбірелерні алынҷа таныхтабысханнар. Оларға онарлап сыйыхтар тимнеп салғаннар.

Пуу хабарны толдыразынаң ссылкаҷа иртібізіп, хығырып аларға чарир.

Ағбан городтың ӧнетін порталы